អាជីវកម្មស្ករត្នោត ខេត្តកំពង់ស្ពឺ បានធ្លាក់ចុះ

4:18 AM |

ស្ករត្នោតខេត្តកំពង់ស្ពឺ ដែលទទួលបានលិខិតបញ្ជាក់ផលិតផលសម្គាល់ទីតាំងភូមិសាស្ត្រ (GI) បានលក់ចេញចំនួន ១២ តោន នៅដំណាច់រដូវ ប្រមូលផលឆ្នាំនេះគឺមានការថយចុះប្រមាណ ៣០ ភាគរយ បើប្រៀបធៀបនឹងរដូវប្រមូលផលកាលពីឆ្នាំមុន ។ លោក សំ សារឿន ប្រធានសមាគមអភិវឌ្ឍន៍ និងលើកកម្ពស់ស្ករត្នោតខេត្តកំពង់ស្ពឺ បានឲ្យដឹង ថា មូលហេតុមួយក្នុងចំណោមមូលហេតុជាច្រើន ដែលបណ្តាលឲ្យចំនួននៃការលក់ចេញមានការថយចុះ គឺបណ្តាលមកពីការកុម្ម៉ង់ទិញយឺតក្នុងឆ្នាំនេះព្រោះថា មានក្រុមហ៊ុនចំនួន ២ ទៅ ៣ ទើបតែបញ្ជាទិញ នៅខែមេសា និងឧសភា ហើយសមាគមមិនអាចផលិតទាន់។លោកបានបន្ថែមទៀតថា
ប្រសិនបើពួកគេមកទិញតាំងពីដើមរដូវ យើងនឹងអាចទទួលការកុម្ម៉ង់នេះបាន ហើយការលក់ចេញនឹងអាចមាន ចំនួនច្រើនជាងនេះ។ សម្រាប់គ្រួសារ ដែលជាសមាជិកក្នុងសមាគមស្ករត្នោតខេត្តកំពង់ស្ពឺ ផលិតកម្ម ស្ករត្នោត គឺជាមុខរបរសំខាន់ទី ២ បន្ទាប់ពីដំណាំស្រូវ។លោក ចន សុខា ទីប្រឹក្សាសមាគមអភិវឌ្ឍន៍ និងលើកកម្ពស់ស្ករត្នោតខេត្តកំពង់ស្ពឺក៏បានឲ្យដឹងដែរថា ជាទូទៅរដូវកាលផលិតស្ករត្នោត GI គឺចាប់ផ្តើមពីខែវិច្ឆិកាដល់ខែឧសភា ហើយផលិតកម្មឆ្នាំនេះហាក់មានការថយចុះបន្តិចបន្តួច ស្របពេលដែលគ្រួសារមួយចំនួនចាប់ផ្តើមងាកចេញពី ការផលិត ស្ករត្នោតប្រភេទ GI ទៅផលិតប្រភេទស្ករត្នោតធម្មតាវិញ ព្រោះមិនសូវមានភាពស្មុគ្រស្មាញ និងត្រូវចំណាយពេលតិចជាង។លោកបន្តថា ផលិតផល ស្ករត្នោតប្រភេទ GI នៅតែមានបញ្ហា ប្រឈមជាច្រើនក្នុងការប្រកួតប្រជែងជាមួយប្រភេទស្ករត្នោតធម្មតា ព្រោះតម្លៃក៏ថ្លៃជាងស្ករធម្មតា ហើយការទទួលស្គាល់ពីគុណភាពរបស់វាក៏នៅមានកម្រិតនៅឡើយ។ស្ករត្នោត GI លក់នៅលើទីផ្សារមានពីរប្រភេទសំខាន់ៗ គឺស្ករម្សៅ និងស្ករផែន។ នៅឆ្នាំនេះ ស្ករម្សៅលក់ក្នុងតម្លៃ ៦ ០០០ រៀលក្នុងមួយគីឡូក្រាម គឺកើនឡើង ត្រឹម ៤ ៥០០ រៀលក្នុងមួយគីឡូ ក្រាមកាលពីឆ្នាំមុន។ ចំណែកឯតម្លៃស្ករត្នោតប្រភេទស្ករផែនបានកើនឡើងផងដែរ គឺមានតម្លៃ ៤០០០ រៀលក្នុងមួយគីឡូក្រាមកើនឡើង ៥០០ រៀលពីតម្លៃកាលពីឆ្នាំមុន។