ខេត្តកំពង់ចាម៖ រថយន្តម៉ាកឡិចស៊ីស RX 300 មួយគ្រឿង ពណ៌ខ្មៅ បានបើកបោះពួយយ៉ាង លឿននៅលើផ្លូវជាតិលេខ៧ ហើយបានរេចង្កូតទៅបុកផ្ទះ ប្រជាពលរដ្ឋចំនួន២ខ្នងដែលនៅជាប់គ្នា បណ្ដាលឱ្យរងការខូចខាត បាក់ទ្វារផ្ទះនិងម្ចាស់ផ្ទះរងរបួស។

 ហេតុការណ៍នេះកើតឡើង កាលពីវេលាម៉ោង៩យប់ថ្ងៃទី៥ មិថុនា ២០១៣ នៅក្នុងភូមិសំរោង ឃុំទ្រៀក ស្រុកមេមត់ ភ្លាមៗនោះជនបង្កបានរត់គេចខ្លួនបាត់ ហើយរថយន្តត្រូវសមត្ថកិច្ចនាំយកទៅ រក្សាទុកនៅអធិការដ្ឋាននគរបាលស្រុកមេមត់ ដើម្បីស្រាវជ្រាវតាមរកម្ចាស់។

 លោកអធិការនគរបាលស្រុក មេមត់បានឱ្យដឹងថា ជនរងគ្រោះជាម្ចាស់ផ្ទះឈ្មោះជី ស៊ាងលី ភេទប្រុស អាយុ៣២ឆ្នាំ ខូតខាតទ្វារដែកចំនួន៨ផ្ទាំង ខូចជញ្ជាំងទំហំ២,៥០ម៉ែត្រ គុណ ៣,៥០ម៉ែត្រ មួយផ្ទាំង របើកជញ្ជាំងក្ដារឈើ១ផ្ទាំង។ ចំណែកម្ចាស់ផ្ទះមួយទៀតឈ្មោះញ៉ុក ណារិន ភេទប្រុស អាយុ៥២ឆ្នាំ រងរបួសស្រាល ហើយភ្លាមៗនោះជនបង្ក បានរត់គេចខ្លួនបាត់ តែត្រូវបានគេស្គាល់ថា ឈ្មោះអ៊ិត តៅ ភេទប្រុស អាយុ២៦ឆ្នាំ រស់នៅភូមិដំរិល ឃុំដំរិល ស្រុកអូររាំងឪ៕