ប្រាសាទបន្ទាយស្រីមិនគួរមើលរំលង!Trackback

ផ្សាយក្នុងផ្នែក Sabay ទស្សនាចរ ដោយ meas.roth កាលពី 128 days ago 0 Comment(s)

ប្រជាជន ដែលទៅលេងខេត្តសៀមរាប ភាគច្រើនប៉ុនប៉ងទៅទស្សនាត្រឹមតែប្រាសាទអង្គរវត្ត។ លុះត្រាតែគេសល់ពេលច្រើន ទើបគេបន្តទៅលេងនៅប្រាសាទអង្គរធំ ឬប្រាសាទដទៃទៀត។ ប៉ុន្តែបើបានទៅទស្សនាប្រាសាទនានាក្នុងខេត្តសៀមរាប ប្រាសាទបន្ទាយស្រីមិនគួរមើលរំលងឡើយ។

ប្រាសាទ បន្ទាយស្រី ដែលស្ថិតនៅចម្ងាយប្រមាណជា៣០គីឡូម៉ែត្រ ពីទីរួមខេត្តសៀមរាប ដោយធ្វើដំណើរលើថ្នល់ក្រាលកៅស៊ូ ក្នុងរយៈពេលមិនលើសពីមួយម៉ោង បានកប់ខ្លួននៅកណ្ដាលព្រៃ។ បើគេក្រឡេកមើលប្រាសាទនេះ មានការទាក់ទាញភ្ញៀវទេសចរចូលមកទស្សនាមិនចាញ់ប្រាសាទបុរាណធំៗនៅ ក្បែរក្រុងសៀមរាបប៉ុន្មានទេ។ ភ្ញៀវទេសចរបន្ដកន្ទុយគ្នាមកទស្សនាប្រាសាទនេះស្ទើរពុំលុះថ្ងៃណា ឡើយ។ តើអ្វីដែលជាភាពទាក់ទាញរបស់ប្រាសាទបុរាណមួយនេះ?

ប្រាសាទ បន្ទាយស្រីមានទំហំតូចជាងប្រាសាទនានា ប៉ុន្តែប្រាសាទនេះមាននៅសេសសល់ក្បាច់ផ្កាភ្ញី រូបចម្លាក់លៀន ឬលឹបលើជញ្ជាំង រូបឆ្មាំយាម និងរូបចម្លាក់ដ៏គួរឲ្យចាប់អារម្មណ៍ដ៏ទៃទៀតជាច្រើន។ រូបចម្លាក់ និងក្បាច់ផ្កាភ្ញីនៅប្រាសាទបន្ទាយស្រីនេះ គឺនៅល្អ ព្រោះពុំត្រូវបានធ្វើឲ្យសឹករិចរិលដោយកត្តាធម្មជាតិ ឬដោយមនុស្សឡើយ។

បើគេពិនិត្យមើល ប្រាសាទបន្ទាយស្រីនេះទាំងមូលវិញ គេនឹងឃើញមានថែវព័ទ្ធជុំវិញប្រាសាទ។ នៅក្នុងថែវប្រាសាទនេះ គឺមានគូរទឹកព័ទ្ធជុំវិញ លើកលែងតែច្រកចូលទៅកាន់ប្រាសាទនោះតែប៉ុណ្ណោះ។ តួប្រាសាទមានទំហំតូចជាងប្រាសាទអង្គរវត្តឆ្ងាយណាស់ ប៉ុន្តែហោជាងរបស់វាសុទ្ធតែមានក្បាច់ចម្លាក់គួរជាទីចាប់ អារម្មណ៍ ដែលមិននឹកស្មានដល់ ថាមនុស្សសម័យមុនអាចធ្វើបានឡើយ។

ប៉ុន្តែ ការចូលទៅកៀកនឹងជញ្ជាំងប្រាសាទផ្ទាល់ ឬចូលទៅខាងក្នុងប្រាសាទត្រូវបានហាមឃាត់ ព្រោះដើម្បីបង្ការរូបចម្លាក់ និងក្បាច់ផ្កាភ្ញីដែលបន្សល់រាប់រយឆ្នាំមកហើយ ឲ្យមានរូបរាងដូចដើម ដើម្បីទុកឲ្យអ្នកស្រាវជ្រាវជំនាន់ក្រោយបានសិក្សាបន្ត។

ប្រាសាទ បន្ទាយស្រីនៅមិនឆ្ងាយពីទីរួមខេត្តសៀមរាបប៉ុន្មានទេ ព្រមទាំងមានផ្លូវល្អទៅដល់ទីនោះស្រាប់។ ដូច្នេះ បើបានទៅទស្សនាប្រាសាទបុរាណនានា ក្នុងខេត្តសៀមរាប ប្រាសាទបន្ទាយស្រី ដែលពោរពេញដោយក្បាច់រចនារស់រវើក មិនគួរឲ្យមើលរំលងឡើយ៕